لاقووو حل يا جماعه

بدناش نلاقي حل لإسم علاء و الاء بالانجليزي ؟!
الاسمين بكتبوهم ala'a ..
واحنا علينا نحزر ونتوقع ونستنتج ونستخير!!
اي والله هالاسم خششني بالحيط مليون مره ..
والمشكله كل اللي اسمهم الاء او علاء (انجليزي) بتكون صورة بروفايلهم غامضه .. محيرة ،، مُربِكة ،، عليها رصد ،، مش مبينه شب ولا بنت .. بحسهم قاصدين هالقصه او ابصر كيف !!
يعني مش حلوة بحقي الصراحه اقعد احكي مع ( ala'a ) وابعتلها اغاني وابعتلها صورتي عالبرنده وازبط كتابتي معها واختصر النجوم والتووت واعمل حالي فايع واحكيلها انو احنا طابخين كنتاكي مع انو اكون حاطت صحن ( المجدّرة ) قدامي وبتسلى فيه ، وبفصل الرز عن العدس ..
ومش حلوة بحقي اقنعها انو كل اواعيي من ماسيمو دوتتي .. وانا زبون ببالة العبدلي و بستنى بلوزتي لتنشف عالحبل مشان البسها ..
ومش حلوة اضل اكتب هههههه عشغلات كتير زنخة بتكتبها !! ومش حلوة احكيلها اني عم بحكي معها من الآيباد تبعي مع اني شابك من موبايلي وواقف عطرف البرنده مشان اقدر اسرق وايرليس .. واقولها بدي اطلع اشم هوا عالبرندة مع اني طالع عالسطح اشوف تنك المي ازا تعبّى مشان اطفي الماتور ..
بالاخير اكتشف اني بحكي مع شب اسمو علاء ويبعتلي صورتو بالشبّاح بقهوة الغندور بالعقبه ،، ولابس زنوبه واصابع رجليه طالعين منها وخابطين بالارض والصورة نفسها عرقانه من الشوب !!
بنفس الوقت مش حلوة اكون احكي مع ( ala'a ) واحكي بلغتي الشوارعيه .. ويا كبير ويا غالي .. ونص كلامنا تووووت و زائد تمن طعش .. ولما يسألني شو بتعمل اقولو بتفرج عموقع *** (اللي لون خلفيتو كُحلي) .. و مش كتير ارد عليه واطنشو وكل نص ساعة ارد بكلمة .. وما اشيلو من ارضو .. ولما بالغلط بالغلط اطلب صورتو .. يبعتلي صورتو يطلع بنت احلى من ليلة العيد زمان .. احلى من اخر حصة يوم الخميس بالمدرسة زمان ..
شو اساوي بالحالة هاي انا ..
لاقووو حل يا جماعه