اخي الشاب العزيز
اخي الشاب العزيز ،،
اذا شايف حالك كذاب و نسونجي و خاين ومعكاش ليرات وعليك ديون ( زي حالاتي )
تتجوزش ،، تفوتش هالفوته كلها ملكاش مصلحه !!
بزبطش تظلم هالبنت معك وتنشفلها دمها ،، الزواج طلع قصه كبيره عمي مش مزح ،، مسؤولية و جو زنخ وقصص عيله ومن هالحكي !
انسى ما الك مصلحة ،، طلع الزواج الو طقوس خاصه ملناش عليها ،، مش ناقصنا دعاوي ،، وحسبي الله فيك وهالقصص ،، وفرلي عحالك هالقصص واصبرلك شوي لتشوف حالك قادر عهالمعركة خش عليها وتجوز ،،
يعني الزواج مش بس شسمو ،، طلع فيه قصص اكثر من الشعب الصيني !!
حتى قصص العزايم الها تقاليد ،، اهلك اول ،، واهلها ثاني ،، و في نظام معين ،، ولا سهر ولا صحاب ولا بطيخ ازرق ،، ولازم تحب مرتك وقصص طولة البال هاي ،، والخاتم واحترام العلاقه الزوجيه ،، الزواج بدو ( صرّاف آلـي ) سيدي ،، بدك تضل تدفع ،، اما هسا وانتا عزابي عادي تنام بدون مصاري ،، واكبر همك بكيت الدخان ،، سيبك من قصص الهدايا ،، وعيد ميلاد اخت مرتك ،، وطهور ابن خالة حماتك ،، و خطبة اخت بنت عديلك !!
واللي رح ينط ويقولي حب ،، بدي اقلو يزم حب مين يا غالي ؟! حب امك يا كبير ،، وخلي حبيبتك تضل تحب كاظم ووائل كفوري احسن من الحكي الفاضي !
- بالنسبه للجماعه اللي رح يكتبو كومنتات فيها دليل من القرآن الكريم ،، كلامكم صح و طبعا الرزق ع الله ،، معكو حق ١٠٠٪ ،، بس انا بحكي عن واقع حياة حاليه !
احنا مش قد هالقصص لا مالياً ولا فكريًا ولا اجتماعيًا ولا نفسيًا ولا اسماعيل ياسين !
هسا رح يجي واحد متجوز يقلي :
اخي انا صارلي متجوز ٣ سنوات والحمدلله مبسوط جدًا مع زوجتي والامور تمام والزواج المبني عالاحترام والمثاليه ناجح !
وانا حاب اقولك انتا كذاب سيدي ،، انتا كتبت هيك لأنو مرتك مراقبيتك ،، انتا من جوى مخنوق ،، انتا بدك تنفجر ،، لا مبني ولا مجرور حبيبي ،، سيبك من هالقصص ،، انتا لولا كاتب عحالك ٥ الاف متأخر ولا كان من زمان خلعت يا غالي !
اسفين عالإطاله ،،
يلا بالرفاه والبنين باي
ليست هناك تعليقات:
إرسال تعليق
تعليقك يهمنا :)